جزائري..........هذا اصلي.......

هذا شعاري هذا إسمـــــي *** هذا تاريخي،هذا شعبي،هذا أصلي


الجزايري راو صافي،وأصلو واضح *** عــندو الأمل وميخليش المورال طايح


رايح،ويدافع على الشعوب المحقـــورة *** الحقوق المقهورة تاع البنات وتاع الذكورا


والله،الجزايري يحب الكفــــــاح *** يحب يفضح الظلم وميهموش خلاص كيفاه


الخوف جامي كفاه،الجزايري يكره الذل *** ديما يوقف مع الحق حتّى لوكان راح يتقتل


حتّى ولوكان يسيح الدّم،المهم قدرو عالي *** كــي يضحّي بنفسو بالنّسبة ليه الأمر عادي


الجزاري بحالي حاب يعيش ديما عزيـــز *** بالسيوف تاع ماسينيسا،وستيلو تاع بي باديس



الجزايري راو يميّز يضّامن مع الغاشـــي *** الجزايري راو ساجي كي يغضب يحب يفاجي


الجزايري عايش بقدرو وبالحقرة ماهوش موالف *** يصـرى واش يصــرى ولد الجزاير يموت واقف



الجزايري راو عاش وشاف قــدّاه من أزمـة *** كـــانت لازمــــة ومنها الناس ولاّت عازمة


مالا أسمــــــع...لكان الحجار تدير جــبال *** أعــــلم بلّي الصعوبات هي صح لي تدير رجال


مالا على جال هاذ الشي عندنا جيل ،عندنا شباب ** * ميفقدوش الأمل مام لكان تسكر في وجهم الباب


يا ناس...الجزايري راو دمّو سخــــــــون *** فــــي قلـبو إرادة قادرة تريّب كل الصخور


قادر صح يخوض حروب بلا حســــــا ب *** بين الخير بين الفساد،بين الأفراح والأحزان


الجزايري انسان،عبد يعيش بقـــدر و *** يصبر على القدر حتى لنهار يعدّي لقبرو


كيف هكذا دارو لي قبلو،ربحو معارك كبرى *** وغـــــــرسو في قلوبنا المبادئ تاع الثورة



وحدة،أخوّة شجاعة معاها قــوّة *** الجزايري هذا هوَّ،محال يرجع لورا


الجزايري التاريخ تاعو كبير وباين *** الــدليل راو يحتفل بالهجرة واليناير


الحكاية راي طويلة وبدون غلاطة *** مـن ثورة 54 للغيران تاع غرناطة



الجزاري مايحتاجش للميـــــــــديا *** باه يبرهن بلي أصلو راو من وقت نوميديا



حمادي وباربار،أمازيغي وشعبي أصيل *** الجزايري عندو تاريخ منذ آلاف السّنين


و صح المسلمين هوما لي جابو العروبة *** وجــدودنا كملوها وداو الدّين لأروبا



من ثمّة الشعب تعلم وفهم المضمون *** يساند ديما خوه يكون ظالم ولاّ مظلوم


العراق وفلسطين،عمرنا ما خنّا الأمانة *** جامي خلاّنا القلب تاعنا نعيشو بلا إخوانا



ونقولك حاجة،الشرف تاعنا المحبّب *** هـو أنّو الجزايري راو من أمّة محمّد



جزايـري.......................... .........أنا جزائري



هذا شعاري هذا إسمـــــي***هذا تاريخي،هذا شعبي،هذا أصلي .
.
.
.
.[ندعوك للتسجيل في المنتدى أو التعريف بنفسك لمعاينة هذه الصورة]
.
.
.
.
. [ندعوك للتسجيل في المنتدى أو التعريف بنفسك لمعاينة هذه الصورة]
منقولللللللللللللل